Midilibre.fr
Tous les blogs | Alerter le modérateur| Envoyer à un ami | Créer un Blog

05/11/2008

Per una oficializacion vertadièra de l'occitan

D'en primièr, cal dire qu'a Iniciativa per Occitània nos agrada pas lo tèrme de "lenga regionala" per l'occitan. L'occitan es d'efièch pas la lenga d'una region especifica de França, mas se parla dins mai d'una e subretot es oficiala en Catalonha e protegida dins las Valadas alpencas de l'estat italian. Per nosautres, es la lenga non pas d'una region, mas d'una nacion, una nacion qu'es pas encara conscienta de se mas qu'existís e que son expression pròpria es la lenga occitana. Mai que mai, las lengas son pas en se nacionalas, destinadas a l'oficializacion e l'espaci public, ni regionalas, condemnadas a un estatut inferior e l'espaci privat abans de desaparéisser : tota lenga pot èsser l'espression d'una nacion, baste que los que la parlan o vòlgan.

Basta. Las lengas "regionalas", que sonarem puslèu "minorizadas", la constitucion francesa las reconeis ara oficialament coma d'elements de son patrimòni, dins son article 75.1, mas aquel article 75-1 dona pas de garentida seriosa a las lengas minorizadas pr’amor qu’es clafit d’ambigüitats:
- Rèsta encara possible que done luòc a una interpretacion ostila de l’estat francés, que i distinguiriá lo francés coma lenga oficiala unica e las lengas minorizadas coma un "patrimòni” passadista e exclús de tot usatge oficial.
- An inserit l’article 75-1 dins lo títol relatiu a las collectivitats localas. Aquò pòt entraïnar benlèu una reconeissença positiva per l’occitan, en quichant las regions e los departaments d’Occitània a s’associar per defendre lor lenga comuna. Mas tanben aquò pòt facilitar una atomizacion de las politicas de las regions e dels departaments, amb de resultats contradictòris. Per exemple, es pensable que certans grops assagen de fragmentar nòstra granda lenga occitana per la fragilizar en fàcia del francés, per contestar son unitat o per l’embarrar dins un ultralocalisme ineficaç. Iniciativa Per Occitània se mobilizarà dins los ans venents per quichar vèrs una aplicacion positiva, intelligenta e maximalista de l’article 75-1:
- Volèm una oficializacion completa de las lengas minorizadas, amb lor ensenhament sistematic, amb lo drech de las utilizar sens restriccion dins la vida publica e amb la valorizacion de lor creacion literària e musicala.
- Volèm que las collectivitats localas que compausan Occitània menen amassa una politica de collaboracion armoniosa per la lenga occitana: entre las regions e departaments que se situan dins l’estat francés, mas tanben amb las entitats dels estats vesins que cobrisson Occitània (Val d’Aran e Generalitat de Catalonha; regions de Piemont e de Ligúria; Mónegue).

Una aplicacion positiva de la constitucion en favor de las lengas minorizadas, es clar, foncionarà sonque se i a una mobilizacion permanenta de las populacions e dels movements de las minoritats. Subretot, la lenga occitana avançarà dins la societat d’aitan mai que farem créisser nòstra revendicacion d’independéncia politica per Occitània e que farem recular l’ideologia centralista de l’estat francés.

FREE OCCITÀNIA!

Les commentaires sont fermés.