Midilibre.fr
Tous les blogs | Alerter le modérateur| Envoyer à un ami | Créer un Blog

20/12/2008

Manifèst de 2005 : primièra partida

Per difusar nòstre manifèst de 2005, vos en prepausarem la lectura.

Ne vaicí la primièra partida : « per une Occitània liura e europèa »

Occitània es lo nòstre país, es la tèrra ont vivèm, es una comunitat culturala que s'es bastida dins l'istòria a l'entorn d'una lenga comuna: l'occitan o lenga d'òc.
Occitània es lo quadre d'accion ont convergisson los interèsses de nòstras regions istoricas: Alps del Sud, Auvèrnhe, Bearn, Borbonés, Gasconha, Guiana, Daufinat, Lemosin, Lengadòc, Mónegue, País Niçard, Val d'Aran, Vivarés e Velai.

Occitània es un espaci de relacions socialas e economicas qu'a conegut divèrses assages d'unitat politica dins son istòria: lo Reialme Visigòt, los Tres Poders tolosan, aquitan e catalan-provençal als sègles XI-XIII., l'Union uganauda de 1573 a 1598, la Republica federalista de 1793, las Comunas e la Liga del Miègjorn en 1870-1871...
Tanben Occitània es un espaci que s'es fach amb de moviments socials e civics nombroses, mesclats amb nòstra cultura latina prigonda, que nos rendon fièrs de nòstras libertats civicas e de nòstre gost per la justícia e la convivéncia.

Sèm arribats al sègle XXI a un estadi critic per la subrevida d'Occitània coma comunitat umana, a causa dels estats francés, espanhòl e italian que nos menan a la quasi-assimilacion culturala, en nos impausar un conflicte de lengas e de culturas.
L'estat francés, jos forma d'evidéncia ideologica, se rend copable d'una politica de destruccion culturala, d'un imperialisme etnic, que nos empacha d'accedir liurament a nòstra lenga, nòstra istòria, nòstra autoconoissença e donc nòstra autoestima.
Los estats espanhòl e italian autrejan una proteccion lingüistica a nòstra lenga occitana mas dins de proporcions insufisentas.
Aquela injustícia es ligada a una denegacion de nòstras realitats socialas e istoricas e a l'incapacitat, sustot francesa- de pensar un foncionament de tipe federatiu (en Occitània, dins l'Exagòn, e mai en Euròpa e dins las colonias a passat temps).

Fàcia a aquela situacion, lo laboratòri politic, cultural e social Iniciativa Per Occitània a per tòca d'avançar, per sa reflexion e son accion, vèrs l'emancipacion d'Occitània. Defendèm lo drech inalienable de nòstre pòble de dispausar de se e de se constituir en nacion independenta.
L'independéncia d'Occitània ven una necessitat practica: es la sola via que garentís nòstra subrevida culturala e nòstra egalitat amb los autres pòbles e culturas. Es una solucion civica que prepausam democraticament a totes los ciutadans d'Occitània.
Cercam d'organizar la liberacion d'Occitània pragmaticament, per estapas:
1° Conscientizar la populacion d'Occitània per que retròbe son autoestima e qu'accedisca a sa cultura, liurament e sens empach.
2° Obténer una autonomia creissenta per nòstras regions occitanas e sarrar los ligams gràcias a las cooperacions interregionalas e transfrontalièras.
3° A partir de nòstras regions federadas e autonomizadas, fondar un estat liure d'Occitània, democratic e descentralizat, que serà un aderent dirècte de l'Union Europèa.
4° Tornar a d'espacis naturals de la nòstra economia e cultura, coma l'Espaci Occitanocatalan, l'Arc Latin de la Mediterranèa e l'Arc Atlantic.

Volèm acompanhar aquela liberacion amb un projècte complet de societat, dins los domenis politic, cultural, social e economic.
Aqueste movement lo volèm tanben enrasigat dins un corrent de pensada prèp de las nòstras conviccions: progressista, contra totas menas de discriminacions, per un desvolopament respectuós de la Tèrra e de sos estatjants.

Les commentaires sont fermés.