Midilibre.fr
Tous les blogs | Alerter le modérateur| Envoyer à un ami | Créer un Blog

06/01/2009

La posicion d'Iniciativa Per Occitània subre Palestina e Israèl

A l'escasença dels dramas actuals de Gaza e Sderoth, Iniciativa Per Occitània vòl centrar l'atencion del public sus qualques veritats elementàrias.
Aicí, en Occitània, lo combat prioritari contra l'imperialisme es ben la lucha per l'independéncia del pòble occitan. Acceptarem pas jamai aicí, en Occitània, que lo sosten a la causa palestiniana o que lo sosten a Israèl passen abans la causa occitana (e acceptarem encara mens que certans occitanistas, que se pretendon patriòtas, se dividiscan a prepaus d'Israèl e Palestina).
Iniciativa Per Occitània es escalustrat per la desbaucha de violéncia que s'arrèsta pas dempuèi mai de cinquanta ans en Palestina e en Israèl.
La populacion aràbia palestiniana a lo drech de viure dins la dignitat e la patz e de se constituir un estat independent e viable. Condemnam los atacs recurrents de l'estat d'Israèl contra la populacion palestiniana e la colonizacion josieva de las zònas aràbias. Son un mesprètz prigond devèrs la populacion aràbia e una ignorància cinica de sas sofrenças.
La populacion josieva a lo drech de viure dins un estat d'Israèl que siá melhor. L'agressivitat de l'estat d'Israèl e l’integrisme sionista vèrs los arabis son tanben una menaça contra la quita patz de la populacion israeliana. Condemnam atanben los nombroses movements palestinians que practican lo fanatisme religiós, lo culte morbid del martiri e l'asirança del pòble josieu. En particular, l'Hamàs pòrta una granda part de responsabilitat dins l'esperlongament de la violéncia e dins la sofrença dels arabis.
La solucion als conflictes araboisraelians poiriá passar, saique, per una intervencion de l'ÒNU e dels Cascos Blaus amb de mejans serioses per impausar la patz. Tota solucion de patz dirècta entre israelians e palestinians sembla quimerica, malaürosament.
Iniciativa per Occitània sosten los grops pacifistas que militan per la patz e l'amistat entre josieus e arabis e admira lor coratge dins aquel clima dominant d'asirança e de marrida fe.

Free Occitània!
Iniciativa Per Occitània
lo 6 de genièr de 2009
www.iniciativaoc.org

Les commentaires sont fermés.