Midilibre.fr
Tous les blogs | Alerter le modérateur| Envoyer à un ami | Créer un Blog

17/01/2009

La paralisi de l'ivèrn es inadmissibla

Iniciativa per Occitània, lo laboratòri politic, culturau e sociau, denóncia lei blocatges dei transpòrts, dei malhums electrics e dei sistèmas de caufatge qu’an afectat lo nòstre país dempuei decembre e genier. Lei regions d’Occitània an subit un marrit tractament e una negligéncia inadmissibla a causa de l’incompeténcia de l’estat francés.

Lei talhadas d’electricitat e de caufatge an afectat Provença, lo Massís Centrau e lei Pirenèus. La paralisi deis estradas e autoestradas per la nèu a afectat Vivarés, lo Daufinat e Provença. Tanben la nèu a immobilizat l’aeropòrt internacionau de Tolosa.

Dins un país modèrne, es inadmissible qu’aquelei problèmas de gestion e de l’esquipament public blòquen de regions entieras pendent de jorns entiers. Nòstrei trabalhadors, nòstrei fogaus e nòstra economia n’an sofèrt.

Tenèm per responsable l’estat francés centralizat, incapable qu’es de garentir de mejans e d’instrastructuras en estat de foncionar per lei regions d’Occitània. Lo centralisme francés empacha lei regions occitanas de s’autoorganizar e de s’esquipar correctament còntra lei dificultats naturalas, que s’agisca de la nèu e de la freg, deis aigats o dei fuòcs....

Aquelei casudas de trenta centimètres de nèu e aquela freg intensa avián ren d’extraordinari. Nòstra tèrra occitana coneis periodicament d’ivèrns durs. Mai lo poder francés centrat a París difusa d’estereotipes sus Occitània: nos vei sonque coma lo país dau soleu, de l’estiu e dei vacanças. Lei mèdias francés (parisencs) s’amusan d’exibir leis imatges de Marselha paralisada sota la nèu, coma se foguèsse un eveniment insolit, mentre que nosautres, leis abitants d’Occitània, patissèm e podèm pas trabalhar.

La solucion a aquelei problèmas es de donar un poder d’autonomia ai regions occitanas, e a tèrme de far d’Occitània un estat independent. Ansin tendrem nosautres lei mejans de nos esquipar decentament en fàcia deis ivèrns rudes e dei dificultats naturalas divèrsas qu’afèctan nòstre país regularament. Una Occitània liura, confrontada a l’ivèrn, serà aitan ben esquipada coma Soïssa o Àustria.

Free Occitània!
Lo 16 de genier de 2009

http://iniciativaoc.midiblogs.com/
http://es.groups.yahoo.com/group/iniciativa-per-occitania/


Les commentaires sont fermés.