Midilibre.fr
Tous les blogs | Alerter le modérateur| Envoyer à un ami | Créer un Blog

11/11/2013

Succès de l’acte d’Aniana, en omenatge a las victimas occitanas de la Primièra Guèrra Mondiala

1-Aniana2013.jpg
[oc] las fòtos de l’acte
[fr] les photos de l’acte
[it] le foto dell’atto


2-Aniana2013.jpgL’11 de novembre de 2013, un vintenat de personas rendèron omenatge a las victimas occitanas de la Primièra Guèrra Mondiala. Iniciativa per Occitània convoquèt l’acte. Se passèt davant lo monument als mòrts d’Aniana (Montpelhierenc), que pòrta una lausa amb un messatge pacifista en occitan. Joan Barceló i prononcièt un discors fòrça esmovent. Terric Lausa e Domergue Sumien depausèron una garba amb l’inscripcion “Onor a las victimas occitanas”. S’escotèt l’imne occitan en pensant prigondament a las victimas.


Discors prononciat pendent l’acte
Omenatge al soldat occitan de la Guèrra Granda

3-Aniana2013.jpgL’11 de novembre de 1918 se signèt l’armistici que, enfin, metiá fin a la Primièra Guèrra Mondiala, la qu’èra per los que la vivián la Guèrra Granda.

Soldat occitan, aicí a Aniana, en Lengadòc, 95 ans mai tard, te venèm umilament rendre omenatge. Te venèm dire que t’avèm pas oblidat. Que ta mòrt luènh de ta tèrra, dins los païses del nòrd que non coneissiás pas, se faguèt pas de badas, perque nos sovenèm de tu.

Soldat occitan, nos sovenèm de tos ivèrns passats dins lo freg umid de las trencadas, de las longas espèras dins lo silenci de jornadas calhadas dins l’etèrne recomençament. Nos sovenèm de tos camaradas que tombavan a ton costat, de la dolor de las balas que te traucavan la pèl, de l’odor del gas que te cremava lo pitre.

Soldat occitan, per quina pàtria te batiás? Ja França t’aviá raubat ton país, ja t’aviá raubada ta lenga que podiás pas parlar a l’escòla sens te far umiliar o denonciar. Tos oficièrs te mespresavan e se mesfisavan de tu. Patissiás de vexacions abans d’èsser chaplat. T’acusavan d’èsser coard e de far pèrdre la guèrra.

Soldat occitan, non moriguères pas per França. Moriguères a causa d’ela. Moriguères luènh de ton ostal per una pàtria qu’èra pas tieuna ja que t’aimava pas coma èras.

Soldat occitan, ton enemic èra pas l’alemand. Ton enemic èra lo chauvinisme, èra l’imperalisme que mandèt a la mòrt en nom de França tos fraires e tant de pòbles colonizats coma tu.

Soldat occitan, pensam tanben a tos parents que te perdèron, a ta sòrre que te trobèt de manca per sempre, a ta calinhaira o ta femna que plorèt quand tornères pas, o quand tornères nafrat dins tota ta carn o desfigurat amb la gola rota. Pensam a tos enfants orfanèls als quals, vint ans apuèi, venguèt de luchar contra l’alemand e contra un nazisme que sens l’arroganta França de 1919 seriá estat mai feble.

Soldat occitan, avèm pas oblidadas ta mòrt ni tas sofrenças. Moriguères pas per res, ja que sèm de pè davant tu e que lucham per ta memòria, per ta dignitat e per la libertat que foguèt pas tieuna e qu’es pas encara nòstra.

Tèxt de Gerard-Joan Barceló, en nom d’Iniciativa per Occitània

4-Aniana2013.jpg


5-Aniana2013.jpg


6-Aniana2013.jpg

7-Aniana2013.jpg

8-Aniana2013.jpg

9-Aniana2013.jpg

10-Aniana2013.jpg


11-Aniana2013.jpg

Les commentaires sont fermés.