Midilibre.fr
Tous les blogs | Alerter le modérateur| Envoyer à un ami | Créer un Blog

20/12/2008

Non a la censura : empleguem normalament nòstras lengas nacionalas!

Venèm d'aprene qu'un conselhièr municipal a Perpinhan d'Esquèrra Republicana de Catalonha, Enric Vilanova, a patida la censura perque parla sempre en catalan pendent las sesilhas del Conselh de la vila. Fins ara, sas intervencions èran reviradas en francés dins los comptes renduts, mas sembla qu'a causa de la pression dels ultranacionalistas franceses del FN se'n transcriga pas pus lo contengut, ja que los actes oficials dison sonque : "Enric Vilanova s'exprimís en catalan".

Iniciativa Per Occitània se demanda cossí, ara que las lengas de las minoritats nacionalas son reconegudas dins la constitucion francesa, se pòt encara practicar una censura aitala. Manifestam nòstra solidaritat amb Enric Vilanova e la nacion catalana, e cridam los elegits dins las institucions francesas a la desobesissença civila : lo catalan deu èsser tornar-mai la lenga normala de tota Catalonha coma l'occitan deu reconquistar l'espaci public de nòstre país, Occitània!

07/12/2008

"La France, patrie des droits de l'homme"

Lo mite de França coma patria dels dreches umans es un element tradicional del nacionalisme francés "republican". Ara, Stéphane Hessel, que foguèt un autor de la Declaracion universala dels dreches umans de 1948, pensa çò contrari a aquela vision blosament chauvinista de las causas. Se pòt d'efièch criticar l'inumanitat de las presons francesas e del tractament dels "estrangièrs" e immigrats.

Iniciativa per Occitània vòl precisament prepausar als occitans e occitanas un projècte umanista, dins la tradicion occitana e en rompedura amb l'autoritarisme francés.

11/11/2008

"Le français, langue de la liberté?"

Se legissètz uèi aqueste article del jornal francés Le Monde, veiretz, un còp mai, quant lo nacionalisme francés s'assòcia estrèchament a la lenga.

L'editoralista pretèxta la remessa de dos prèmis literaris franceses, lo Goncourt e lo Médicis, a d'autors estrangièrs, per far l'elògi de la lenga francesa, presentada coma "la lenga de la libertat".

Sèm pas luènh de l'argumentacion de l'escrivan nacionalista francés del sègle XVIII, Rivarol, que vantava "l'universalitat de la lenga francesa". Perqué lo francés seriá la lenga de la libertat ? E non pas lo catalan dels republicans que luchavan contra lo franquisme ? E non pas l'espanhòl dels chilians que volián la justícia sociala e foguèron reprimits pel general Pinochet ?

E non pas... l'occitan del comtat de Tolosa que respectava la libertat religiosa ?

Enfin, los pòbles colonizats per França, los pòbles coma lo nòstre que son existéncia es encara uèi negada per l'estat francés, perqué aurián de veire lo francés coma la lenga de la libertat ? En Occitània, es al contrari lo francés qu'asfixia nòstra cultura.