Midilibre.fr
Tous les blogs | Alerter le modérateur| Envoyer à un ami | Créer un Blog

20/12/2008

Manifèst de 2005 : segonda partida

Segonda partida del manifèst de 2005: “L'emergéncia d'Occitània en Euròpa: un enjòc geopolitic”

Un grand movement d'istòra, uèi, es la construccion europèa, la mondializacion e l'aflaquiment dels estats. Per nosautres, la question estrategica es cossí emancipar Occitània dins aqueste contèxt?
L'emergéncia de las regions e d'Euròpa es un astre. Occitània i deu trobar sa plaça coma una confederacion de regions, desliuras del centralisme francés (eiretièr del bonapartisme), desliuras de las frontièras estatalas, dobèrtas als espacis vesins.
Primièra consequéncia: l'autieuropeïsme a pas cap de sens. La question es pas d'èstre per o contra Euròpa. L'enjòc es de democratizar la construccion europèa, de li donar un contengut social e cultural e d'i garentir la plaça dels pòbles minorizats.
Segonda consequéncia: l'antiindependentisme a pas cap de sens tanpauc. Quin interès de voler restar dins las frontièras dels estats francés, italian e espanhòl mentre que los espacis se dobrisson e se recompausan? E mentre que uèi, 80% de las leis son europèas? Quin interès de gardar de “relacions forçadas” amb París, Roma o Madrid mentre qu'una capitala europèa es plan mai pròcha e afina de l'espaci occitan? Perqué sacralizar las frontièras dels estats que dividisson Occitània? Una Occitània federala, liura e aderenta dirècta d'Euròpa es una amira de mai en mai avantatjosa e imaginabla per nòstre país.
Cal associar lo nom d'Occitània als noms de caduna de sas regions istoricas. Avèm de promòure la riquesa de tota Occitània, de Niça a Bordèu e de Montluçon a Fois. S'agís pas d'un replec localista, s'agís d'assemblar las fondacions d'un patriotisme occitan.
Tot aquò se concep en tèrmes d'escalons complementaris de la democracia, de çò local a çò global: comuna, parçan (país), region, Occitània, Euròpa, Mond.